Un himno feito en equipo: creatividade, música e tecnoloxía
O curso pasado deixounos momentos moi especiais no camiño do noso Polo Creativo, e un dos máis emocionantes foi, sen dúbida, a creación do himno do colexio. Un proxecto no que o alumnado de 5º e 6º de primaria volveu demostrar que cando se mesturan ideas, ilusión e tecnoloxía… pasan cousas marabillosas.
Unha letra creada entre todas e todos
O punto de partida foi reflexionar sobre o noso centro:
que nos identifica, que nos gusta del, como nos sentimos cando vimos ao cole. A partir destas conversas, o alumnado inventou de maneira colaborativa a letra do himno, achegando frases, palabras e ideas que falan de convivencia, amizade, aprendizaxe e ilusión.
A música nace coa axuda da IA
Unha vez pechada a letra, demos un paso máis no uso creativo da tecnoloxía. O alumnado experimentou coa intelixencia artificial para crear a música, explorando estilos, ritmos e emocións ata atopar a melodía que mellor representaba o espírito do colexio. Foi unha oportunidade perfecta para falar do uso responsable, creativo e crítico da IA na aula.
Un videoclip moi especial
Desde o equipo dixital, quixemos completar o proxecto cun toque artístico e divertido:
creamos un videoclip do himno no que a protagonista é nada menos que a mascota da biblioteca, A Fada Acaramelada, bailando ao ritmo da canción. O resultado foi un vídeo cheo de cor, movemento e maxia que encantou a toda a comunidade educativa.
Un proxecto que vai máis alá da música
Con esta actividade o alumnado:
Traballou a expresión escrita e musical.
Desenvolveu a creatividade colectiva.
Coñeceu novas ferramentas dixitais e de IA.
Sentiu o himno como algo propio, creado por e para o cole.
Este himno non é só unha canción: é un símbolo do que somos e do que queremos seguir construíndo como centro. Un recordo precioso do inicio real do noso Polo Creativo… e unha mostra de todo o que aínda está por soar.
Ningún comentario:
Publicar un comentario