A sorodidade en Begoña Caamaño

No marco do traballo desenvolvido no Polo Creativo e en colaboración coa biblioteca escolar, tres alumnas de 4º de Educación Primaria elaboraron o podcast “A sororidade en Begoña Caamaño”, unha proposta que combina investigación, lectura e creación sonora.

Neste programa, as alumnas achégannos á figura de Begoña Caamaño, destacando a súa visión sobre a sororidade e facendo referencia á súa obra Circe ou o pracer do azul.

O podcast é o resultado dun proceso no que o alumnado desenvolveu competencias comunicativas e dixitais, traballando a expresión oral, a selección de información e a creación de contidos propios.

Con este traballo, o centro participa no VIII Concurso de Pódcasts – Radio na Biblio para o curso 2025/26, apostando por proxectos que fomentan a creatividade, o pensamento crítico e o uso responsable das tecnoloxías.

Parabéns ás nosas alumnas polo excelente traballo realizado! 

Pincha no ENLACE para escoitalo!

13 de febreiro Día Mundial da Radio

Día Mundial da Radio e grandes novas para o noso cole!

   No marco do Día Mundial da Radio, desde o espazo de Polos Creativos quixemos celebralo facendo o que máis nos gusta: crear, comunicar e aprender.

   Parte do alumnado de 3º e 4º de Educación Primaria participou na elaboración dun novo podcast da nosa Radio Escolar Voz da Serpe, no que incluímos a canción do noso Entroido “Capitáns Planeta”, unha composición chea de enerxía e mensaxe ambiental que reflicte o compromiso do centro co coidado do planeta.

   Este traballo permitiunos seguir medrando na experiencia radiofónica, explorando a expresión oral, a gravación sonora e o traballo en equipo, sempre desde unha mirada creativa e comprometida co medio ambiente.

   E as boas novas non rematan aquí, o noso centro foi recoñecido como Colexio de Excelencia Medioambiental polos proxectos desenvolvidos dentro do programa "Espeverde", un orgullo que pon en valor o compromiso da nosa comunidade educativa coa sustentabilidade, a reciclaxe, a horta escolar, o composteiro e o respecto polo medio natural.

   Radio, música e conciencia ambiental van da man no noso cole.

   Seguimos aprendendo, creando e coidando o planeta.

 

Inauguración da Radio Escolar

Inauguramos a nosa Radio Escolar

    Este curso damos un paso moi especial no noso centro: estreamos a Radio Escolar, un espazo pensado para dar voz ao alumnado e para aprender a comunicar dun xeito creativo, crítico e responsable.

    A radio convértese así nunha nova ferramenta educativa que nos permitirá traballar a expresión oral, a lectura, a música, o traballo en equipo e o pensamento crítico, ao tempo que achegamos ao alumnado ao funcionamento real dos medios de comunicación.

    Neste vídeo que compartimos podedes ver como está montado o espazo da Radio Escolar, os recursos cos que contamos e o coidado que puxemos na súa creación. Trátase dun proxecto feito con moita ilusión, no que participa toda a comunidade educativa e que irá medrando pouco a pouco ao longo do curso.

    A Radio Escolar será un lugar para:

• Crear podcasts e programas de radio.

• Traballar a educación mediática,

• Dar a coñecer proxectos do centro.

• Compartir opinións, historias e aprendizaxes.

• Aprender a escoitar e a expresarse con respecto.

    Este espazo non é só un estudio de gravación: é un lugar onde as palabras importan, onde se aprende a pensar antes de falar e a comunicar con responsabilidade.

Comezamos esta aventura con moitas ganas e moitas ideas.

Benvidas e benvidos á nosa Radio Escolar!

Radio Escolar "Voz da Serpe. Contigo...sempre!"